Cámbiache o conto

Érase unha vez... De seguro que os nosos primeiros recordos asociados a un libro teñen moito que ver con estas palabras lidas ou escoitadas cando eramos moi pequenos. Os contos clásicos causaron en nós os primeiros formigueos ante a emoción e marabilla da Literatura. Carrapuchiña, Pulgarcito, O gato con Botas, a Bela durminte e tantos outros fixéronnos compañía, seguramente moitas noites antes de durmir.

Por iso este ano, co gallo do Día Internacional do Libro, querémoslle facer unha homenaxe a estes contos clásicos e ós seus personaxes. A maioría son de orixe popular, pero coñecémolos nas versións que chegaron ata nós de mans fundamentalmente de Hans Christian Andersen, os Irmáns Grimm e Charles Perrault, os cales, e un tras outro, foron modificando a historia orixinal ata chegar á versión que máis ou menos coñecemos hoxe.

Durante toda esta semana poderedes ver polo instituto Ilustracións relativas ó tema e nas clases incluso poderedes traballar nalgunha actividade relacionada con mesmo. Desde a Biblio queremos darlle unha nova visión a todas estas historias que todos coñecemos, así que o que che propoñemos é que escollas un destes contos clásicos e fagas a túa versión do mesmo. Inventa o que ti queiras, modifica o final que tantas veces oíches e que todos sabemos de memoria e sorpréndenos cun novo desenlace. Aquí che deixamos a ligazón para que escollas un dos contos (ou máis de un, se queres) e nos deas a túa versión.

Non tes por que limitarte a estes que che deixamos, se prefires escoller outro, tamén podes facelo sen problema.

Podes entregar a túa versión coma sempre en man na Biblio, ou a través do noso formulario de contacto pinchando aquí.

Con todos os relatos elaboraremos o noso propio Libro de Contos e o venres 15 haberá unha pequena sorpresa para todos.

Anímate e participa porque se lle botas imaxinación... Cámbiache o conto

Fotografías de Eugenio Recuenco Vía Once upon a blog