Día das Letras Galegas 2011

Somentes

intentaba conseguir

deixar na terra

algo de min que me sobrevivise

sabendo que debería ter sabido

impedirme a min mesmo

descubrir que só fun un interludio

atroz entre dous muros de silencio

só puiden evitar vivindo á sombra

inocularlle para sempre a quen amaba

doses letais do amor que envelenaba

a súa alma cunha dor eterna

sustituíndo o desexo polo exilio

iniciei a viaxe sen retorno

deixándome levar sen resistencia

ó fondo dunha interna

aniquilación chea de nostalxia.

Hoxe celebramos o Día das Letras Galegas e este ano está dedicado ó poeta monfortino Lois Pereiro. Os da biblio fixemos dous libros LIM para que poñas a proba os teus coñecementos sobre os escritores galegos e acerca do poeta do Grupo de Amor e Desamor.

Cuestionario sobre os escritorios homenaxeados nas Letras Galegas

Coñeces a obra do autor deste ano?

E unha imaxe alternativa

"Cuspídeme enriba cando pasedes por diante do lugar onde eu repouse, enviándome unha húmida mensaxe de vida e de furia necesaria"

Día de Europa

Hoxe é o día escollido para recordar a idea de Europa. Mitoloxicamente falando, Europa era unha raíña fenicia da cal se prendou Zeus e aproveitou a súa capacidade de metamorfosearse en touro para unirse a ela e enxendrar a Minos e Sarpedón. Pero Europa é algo moito máis complexo e rico; é unha noción xeográfica, política, económica, lingüística ...que bebe dunhas fontes comúns e non despreza novos manantiais. Coma sempre, recomendamos achegarse á biblioteca e coller os libros, os discos e as películas relacionados co tema (dun xeito ou outro, son moitísimos).

Reunión do Club de Lectura

O vindeiro venres 6 de maio ás 11.30 faremos unha reunión na que falaremos do libro que vamos ler este trimestre e outras cuestións que nos resulten de interese. Quedades invitados todos os grumetes.


E aquí tedes unha presentación sobre o libro e o seu autor:

Sábato

“O oficio de vivir é tan complicado que leva moito tempo aprendelo, e cando un empeza a saber algo, tócalle morrer”; isto pensaba o escritor arxentino que nos deixou o pasado sábado aos 99 anos. Era un dos Grandes, así, con maiúsculas. Non o encasillaremos en ningures, porque el mesmo definía a súa postura como escritor co símil dun guerrilleiro; tan só podemos darlle as grazas polos valiosísimos regalos que nos fixo: "El túnel", "Abaddón el exterminador" e "Sobre héroes y tumbas" co sobrecolledor “Informe sobre ciegos”(por certo, témolos á vosa disposición na biblioteca). O mundo queda un pouco máis confuso sen el, como cando se marchan os seres extraordinariamente lúcidos e brillantes, pero quédannos as súas poderosísimas palabras. Descansa na paz que tanto che custou atopar, Sábato.

Galería Día do Libro

Esta é unha pequena mostra da actividade febril que houbo o Día do Libro na nosa biblioteca.

Ana María Matute

Hoxe terá lugar a cerimonia de entrega do Premio Cervantes, o máis importante das letras hispánicas. Nesta edición a galardoada é Ana María Matute; é a terceira muller (as anteriores foron Zambrano e Dulce María Loynaz) á que se lle concede este premio instituido desde 1976.

Se pensades que a literatura fantástica se reduce a Tolkien, Harry Potter e vampiros namorados mansos coma años (e que asisten a un instituto diurno!), quizáis deberíades botarlle unha ollada a obras desta autora como Olvidado rey Gudú e Aranmanoth (os cales podedes atopar na biblioteca, por suposto) que son exemplos excelentes da mellor literatura de fantasía histórica.

Así que deámoslle os nosos parabéns a escritora iso sí, berrando todos moi forte porque ultimamente anda algo "teniente" e é que os 85 anos non perdoan, pero a cabeciña tena máis lúcida que moitos de nós. Deixámosvos cun vídeo para que fagades un primeiro achegamento e xa imos reservando os seus libros para os primeiros que os veñan buscar á biblio:

Día internacional do libro

Aínda que cadra un non lectivo non podemos esquecernos do día do libro . Xa o conmemoramos a semana anterior ás vacacións con diferentes actividades, referidas este ano aos contos tradicionais e as diferentes versións que fixestes sobre eles, e que publicaremos no blog ao seu debido tempo. De momento festexámolo coa viñeta de Forges e aproveitamos para recomendarvos estes días de lecer que leades, que leades de todo: libros novos, clásicos, xuvenís, periódicos, revistas… E en calquera formato: dixital ou papel, mecanografiados ou manuscritos, ebooks ou papiros; tanto ten. Leamos para medrar por dentro e para ser máis felices.